SUSTRAIA 3

Sustraia 3a azaletik bertatik dator borrokalari: argi dago ez dela informazio-aldizkari hutsa. Azalak joera bat erakusten du: busti egiten da; zentral nuklearrak ez dira onak, eta haien kontra egin beharra dago. 

 

Eta kargu hartzen zaie udal agintariei: zentral nuklearren kontrako itxialdi bat zen egitekoa udaletxean larunbat batetan, eta zarratuta agertu zen, bertako langileak greban zeudelako aitzakian. langileek berek gezurtatu zuten baieztapen hura eta azaldu zuten zarratzeko agindua goitik etorri zela. Goi-goitik ere ez zen etorriko, bestla zergatik ibili langileak greban zeudela esaten?

 

Eta kargu hartzen hasita, EGIN egunkariarentzat ere bada egurrik: herriak egina herriarentzat, baina, itxura batean, herritarron ahotsik barik.

 

Irakurleak mintzo atalean, gutun bi: Zer euskara-eredu erabili da bat, eta bestea, lidergoak eta asanblearismoa. 47 urte geroago, borroka beretan gaude sartuta. Zaharrak berri, beraz

Elkarrizketa bat ere bada: Ume atzeratuen arduradunekin galdezka. gaur egun herri-aldizkari batetan atzeratuak berba erabiliko balute hemen erabiltzen den moduan, plazan erreko lituzkete. Ez dakigu nortzuk ibili ziren talde hartan, baina emakume ―ze andrazkoak ziren denak― haiek beren seme-alabak eskolatzearen alde izugarria izan zen: haien lanari esker, ume horiek eskolatuta daude beste ume guztiekin batera eta behar dituzten laguntza gehigarriekin.

 

Olerkiak, zelan ez, Joseba Alcalderenak dira.

 

 

 Aldizkaria ikusi eta jaisteko, egin klik hemen: Sustraia 3, kaleratutakoa

 

 

Oharra 1. Ez egin kasurik orrialde-zenbakiei: oker daude, eta berrantolatu egin behar izan dugu. Hemen daukazuena logikoena da; gure ustez, jakina.

 

Aldizkaria agertu zen moduan ikusi eta jaisteko, egin klik hemen: Sustraia 3, ordena okerrekoa

 

Eta Koskaren ostean, Errobi. Gure lekukotasuna.

 

Gure lekukotasuna

 

Zuen aurrean, jaun-andereak,
ibiltzen gara askotan...
bozkarioa ezarri nahiz
denen gogo-bihotzetan!
Baina giroa, ez dago naski,
alaitzeko denboretan ...
Oraindik ere gure herria
ari baita negarretan! (bis)

 

Sustraiakoak ere sentipen berak izango zituztelakoan gaude.

 

Oharra 2. Oraingoan ez dago originalik.

 

 

SUSTRAIA 2

Gabonak denbora tarte zabala da, zabalegia behar bada gauza batzuetarako, eta Sustraia 2 irakurrita jakin dugu zein egunetan kaleratu zuten Sustraia 1: Inozenteen egunaren biharamunean, hau da, 1977ko abenduaren 29an.

 

Koskaren diskoaren iruzkinaren bigarren partea dator. Gainera, jakin dugu Sustraiaren berri eman zutela Egin-en. Lagun arteko futbol txapelketa noiz hasi zen ere ageri da (ondo dago datak zehaztea ez ibiltzeko ez naiz akordatzen esaten). Zentral nuklearren arazoa ere ageri  agertu zen KANekoen (komite antinuklearra) eskutik. 

 

Baina, benetan nabarmentzekoa zenbaki honetan Ay ELIAS edo Sustraiaren kritika artikulua dugu. Zer ez genukeen emango jakitearren nor dagoen Dordoka meketrefe horren atzean.  

 

Horteradak eta menbrillokeriak diño, lehenengo zenbakiaren gainean esan ere. Ez zuten bide txarretik hartuko Sustraiakoek, aurrera egin zuten eta. Akats tipografikoena idatz makinarekin eta Typex-arekin idazten denean, zer esango dugu bada? Guk ordenadorean idazten dugu eta zuzentzaile ortografikoarekin.

Segitzen dugu, bada, jakin barik nork idazten zituen artikuluok. Irudiak ere, gehienak, originalak dira eta pentsatzen dugu Jabi Barcina izan daitekeela egilea eta Pototo bera, ondo dibujatzen zuen eta.

 

 

 

 Aldizkaria ikusi eta jaisteko, egin klik hemen: Sustraia 2, kaleratutakoa

 

 Aldizkaria ikusi eta jaisteko, egin klik hemen: Sustraia 2, originala

 

 

SUSTRAIA 1

Gaur, Sustraia aldizkariarekin gatoz, Lekeition gehien ―guk dakigula― iraun duen aldizkaria: 1977ko Gabonetan kaleratu zuten lehen zenbakia eta hamar urte geroago, 1987an, azkena, 51 zenbakia. Egia esateko, zenbaki bat salto egin zuten, eta haiek ere ez dakite zergatik, beraz 50 zenbaki atera zituzten 10 urtean.

 

Hasieran, 1976an sortutako Gaztedi gazte elkartearen erdi buletin, herriko erdi buletin sortu zen. Gaztedi gazte elkarte modura amaitu zenean, bertan sortutako batzorde batzuk beren kontura segitu zuten: Azkue zineforum eta argazki taldeak, Hondartzako lagun arteko futbol txapelketak, eta Sustraia aldizkariak.

 

Sustraiaren lehen zenbaki honen arduradun Gaztediko zuzendaritza izan zen batez ere, eta tartean izan ziren besteak beste: Julen Atxurra Pototo, Teodoro Meabe Tetxu, Iñaki Malaxetxebarria, Aitor Etxebarria, Aitor Munitis, Joseba Alcalde...

 

Zati batzuk vietnamita batekin inprimatu ziren eta beste batzuk ―irudidunak― multikopista batean. Eta edukiari dagokionez, Gaztediko batzordeetan landuak gehien bat: hemeroteka, euskal kultura, alfabetatzea, sormen saila, ―azken bi hauek zenbaki guztietan izan zuten lekua― jolasgarriak...

Aritikuluen egileak zoritxarrez ez dakigu nortzuk izan ziren, eta Sustraiakoek ere ez. Behar bada, editoriala Pototok egingo zuen eta kulturakoa Aitor Etxebarriak. Poesia bai, sinatuta dago eta: Joseba Alcaldek.

Artikulu batean, Gaztedirako berariazko liburutegi bat sortzeko proposamena dago eta interesgarria da harekin batera datorren irudia; izan ere, Gizarte etxearen adar baten oinplanoa da: eskumako adarra, zine-aretoaren gainekoa. Gela bakoitzean 13-14 urteko 50-60 ikasle sartzen baziren, kalkulatu neurria. Eta ezkerreko adarra ez da ageri.

 

Bide batez, argi geratzen da nagusiek ―nagusien ikuspegitik eta nagusiek kudeatuta― gazteentzat sortutako azpiegiturek ez dituztela gazteen beharrak asetzen normalean.

Sabiñok bidali dizkigu faltan izan ditugun zenbakiak, eta, beraz, kaleratutako guztiak ditugu dagoeneko. Gainera, agindu digu originalak ere eskaneatu eta bidaliko dituela. Hala, bada, baten prezioan bi ipiniko dizkizuegu eskura.

Salneurria 25 pezeta.

 

 

 

 Aldizkaria ikusi eta jaisteko, egin klik hemen: Sustraia 1, kaleratutakoa

 

 

 Aldizkaria ikusi eta jaisteko, egin klik hemen: Sustraia 1, originala

 

Kaleratutakoen kalitatea ez da ona, diru gutxirekin ezin da-eta ezer kalitatez inprimatu. Eta originalek erakutsi digute nola egiten zuten lan: orduko zelo gardenak orban marroi bihurtu dira.

 

Zati batzuk vietnamita batekin inprimatu ziren, eta beste batzuk ―irudidunak― multikopista batean.  Prekaritatea. Kostran ere sumatzen da hori. Zerikusirik ez geroagoko Dzangarekin, eta are gutxiago Zer Esanarekin.

Juan Rodriguez Rosales

Gaurko egunez, 1984an, ETAk Juan Rodriguez Rosales hil zuen. Valdepeñas de Jaenekoa zen (Jaen), baina urte luze zeraman Lekeition bizitzen. Udaltzaina zen eta 48 urte zituen.

 

Nacionalismo Vasco en Lekeitio

Lekeition Euskal Abertzaletasuna 

 

1998an, Agurtzane Lakak eta Iñaki Goioganak Nacionalismo Vasco en Lekeitio/Lekeition Euskal Abertzaletasuna izeneko liburua kaleratu zuten. Harriak eta iraganeko izen ustezko handiak bazter utzi, eta azken urteetako gure historiaren alde bati argi ematea iragartzen zuen liburuak. 

Irakurri, eta gazi-gozo. Liburuaren izenburuak biztutako jakin mina ez  da bete, eta, beraz, gazitik gehiago gozotik baino; izan ere, liburuaren izenburua eta edukia ez datoz bat. 

Francoren eskolak, irakasle erabat erdaldunek eta gure guraso eta ingurukoen beldurrak-edo ezkutuan utzi zigun gure historiaren alde hori, eta ezkutuan segitzen du neurri handi batean gaur egunean ere. Lekeitioko historia hori esan nahi dugu.

Liburuak, gehien bat, Lekeitioko batzokiaren historia kontatzen du: nola sortu zen, nola galdu zen gerran eta nola berreskuratu zuen EAJk demokraziak dezente aurrera eginda. Baina, 1939tik 1976 arteko ezertxo ere ez da aipatzen liburuan, eta hori hutsune handia da, izenburuak besterik iragarri arren. Dena dela, interesantea da.

Edo ez ote ziren, bada, abertzaleak Paul Seijo, Santi Alonso eta Jabier Olabarriaga Bull? Guk dakigula, EGIkoak izateagatik atxilotu zituzten 1971n.

 

 

 

 

 

Ez ote ziren abertzale Jon Mikel Seijo eta Patxi Biskert (Lekeition atxilotuak 1972ko irailean) eta Jon Grande (erbestera ihes egindakoa)?

Ez ote dira nahikoa abertzale Jon Plaza eta Zorion Elordieta 1974an kartzelaratuak?

Horiek eta beste asko dira abertzaletasunaren konpainia eta parte Lekeition, 1937ko apirilaren 28ra arte arte eta 1937ko apirilaren 28tik aurrera.  Egunen batean kontatu beharko dugu horien guztien historia!

Liburura bueltatuta, gu ume ginela, etxe hura ez zen batzokia (ez genekien batzokia zer den ere). Lehenengo, Cosmopolitan izan zen, eta gero, Vitoria Park. Behin ere ez genuen zapaldu leku hura sasoi hartan: ez bide zen gu bezalako jentilajearentzat.

Gero jakin genituen bestelakoak, eta, 1998an, hutsunetxo hura bete zuen liburu honek. Baina Euskal Nazionalismoaren historia Lekeition batzokiaren historia baino askoz ere gehiago da.

 

 

 

 

Liburua eskuratzeko, egin klik hemen: Nacionalismo Vasco en LEKEITIOn Euskal Abertzaletasuna

 

Kuriosoa halakoak esatea gu ere historia horren parte izanda. Horren froga modura, haur behean gure ekarpen txikia Lekeitioko batzokia egiteko.

 

 

 

KALERA

Orain argitalpena hamabostaldi baten harikoa zen, eta behin-behinekoa. Amnistiaren aldeko batzordekoek izan zuten sarriago-edo kaleratu zuten beste bat ere: Kalera. Zoritxarrez zenbaki bakarra daukagu; garrantzitsua, ordea. Ez genuen nahi halakorik, baina nahiak hutsalak dira. Pototo, urrun zebilen ordurako, eta gu, oraindik ere, KALERA aldarrikatzen ari gara.

 

 

 

 

Argitalpena ikusi eta jaisteko, egin klik hemen: KALERA, Lekeitioko Amnistiaren Aldeko Komitea

 

Erdiko orrialde bikoitza:

 

 

 

 

LEKEITIOKO KALE ANTZERKI JAIALDIA

Amaitu berri da Lekeitioko Kale Antzerki Jaialdia

 

Hemen hasi zen dena, 1989an, Imanol Agirreren txapelada bati esker

 Programa ikusi eta jaisteko, egin klik hemen: I. Kale Antzerki Jaialdia

 Eta, hemen segitu zuen

 Eginen agertutako artikulua II. jaialdiaren gainean

Eta hirugarrena ere etorri zen

 
Programa ikusi eta jaisteko, egin klik hemen: III. Kale Antzerki Jaialdia

 

Hirugarrenean, Maskaradak, Carlos Panerak eta Imanolek herri guztia nahastu zuten Mark Legasseren Gastibeltzaren karabinak antzezteko, eta gaur arte.

 

ORAIN

Amnistiaren aldeko hamabostaldia

 

 Argitalpena ikusi eta jaisteko, egin klik hemen: Orain, amnistiaren aldeko hamabostaldia

Erdiko orrialde bikoitza

 

 

 

Lehenago ere egin dugu berba Lekeitioko Komite Antinuklearrari buruz (KAN), bada Lekeitioko Amnistiaren Aldeko Batzordekoak aurreko taldeko berberak ziren. Jenderik ez dagoenean edo konpromisorik nahi ez duenean, batzuek batean eta bestean egon behar dute.

KANekoak eta AABkoak alde guztietan zeuden nahastuta. Ugariak ziren neska-mutilak. Beti konpainia eta parte. Eta, sarri ere sarri, HBkoekin hika-mikan.

1985eko maiatzean, Amnistiaren Aldeko Hamabostaldia antolatu zuten LEA-Artibaiko beste batzordeekin batera, eta tartean argitalpen hau kaleratu zuten. Ez argitaratzeko zorian egon zen, artikulu egileak asko atzeratu zirelako, baina Pototok ez zuen tarterik utzi horretarako: Aste Santu osoa eman zuen artikuluak biltzen eta makinatzen errebista garaiz ateratzeko. Inprenta eta fotomekanika kontuetan Erramun Landaren laguntza izan zuten, artikulu egileak ez dakigu nor izan ziren eta irudiak ez dago esan beharrik nork egin zituen.

Barruan, sasoi hartako problematika guztien gaineko informazioa aurkituko duzue. Problema haiek guztiek beren isla zuten herriko hormetan. Eta hormarako, bazen bat zoragarria: San Joseko monjen ikastetxeko patioaren horma (gaur-egun ez da existitzen).

 

 

Borroka ekologista, amnistiaren aldekoa, euskararena eta drogarena

 

 

 

Borroka feminista

 

Ikusten denez, berrogei urte joan dira eta borroka horietan beretan segitu beharrean gaude. Hori bai, gaur egun halakorik egiten denean, laster dira udalaren brigadillakoak ezabatzeko prest. Hormatik ezabatzeak, hormak eraisteak, ostera, ez du ezer ezkutatzen.

Denak ala inor ez, dena ala ezer ez

bakarka ezin da

fusilak ala kateak

denok ala inor ez, dena ala ezer ez

 

Lekeitio 2

Lekeitioko Ederti, Etnografi eta Edestiaren aldizkaria

 

 

 

Aldizkaria ikusi eta jaisteko, egin klik hemen: Lekeitio 2, Lekeitioko Ederti, Etnografi eta Edestiaren aldizkaria

 

Bigarren zenbaki honen egileak:

RUFO ACHURRA

SABINO AGUIRRE 

BENITO ANSOLA

JUAN AXUBITA

ANDONI BARAINKA

CRESPO C. 

JOAQUIN DEL VALLE

PILAR DEL VALLE

EUSEBIO ERKIAGA

FELICITAS LORENZO   

FRANCISCO OCAMICA

JOSE MIGUEL UGARTETXEA

  

Biltzaile eta koordinatzaile: IÑAKI GOIOGANA

Zaharrak berri, nahi baino gaztelania gehiago testuetan. Eta euskaraz dagoenaz, zer esan? Euskaratzailearen arabera. H-a bai, H-a ez, berben forma estandarra hor konpon...

 

Lekeitio 1

Lekeitioko Ederti, Etnografi eta Edestiaren aldizkaria

 

 

Aldizkaria ikusi eta jaisteko, egin klik hemen: Lekeitio 1, Lekeitioko Ederti, Etnografi eta Edestiaren aldizkaria

 

Izan zen aspaldian Kuriken eta haren ondorengo Kresaletiken aitzindari jo dezakegun aldizkaria bat: Lekeitio, Lekeitioko Ederti, Etnografi eta Edestiaren aldizkaria. 1988 zen, eta izenak 1988ra eraman beharrean ematen zuen 1890eko hamarkadara eraman behar gintuela eta Sabino Aranaren berbakeran murgildu. Barrukoa beste kontu bat zen, ordea.

Ekimen honen talde eragilea edo Talde idazle-laguntzaile:

MIREN AGUR MEABE

RUFO ACHURRA  

BENITO ANSOLA  

EUSEBIO ERKIAGA  

JOKIN ERKIAGA

FERNANDO GARATEA 

lÑAKI GOYOGANA  

FRANCISCO OCAMICA 

JOSE LUIS DE LA TORRE  

VICENTE URKIZA  

JOAQUIN DEL VALLE

Gai interesgarriak, eta tartean Dzanga 16an Fernando Garateak aipatutako Kaxarrankari buruzkoa, Miren Agur Meaberen sormena eta beste batzuk.

Eusebio Erkiagak idatzitakoan Lekeitio izenaren jatorriari buruz, R.M. Azkuek bere Morfologian izentatutako -itio atzizkia aipatzen da. Bada, jakin dakigu euskaltzain oso bat bide horretatik ari dela ikertzen euskal zenbait izenen jatorria. Euskaltzain horrek baztertu egiten du aspaldian nagusi dugun interpretazioa, hau da, Nicetus-etik eratorria dela Lekeitio, eta gure herriaren izenaren sustraiak euskaran bertan daudela aldarrikatzen du.

Hori bai, eragileek berek aitortzen dutenez, nahi baino gaztelania gehiago testuetan.

 

DZANGA 16

 

 

 

Aldizkaria ikusi eta jaisteko, egin klik hemen: Dzanga 16

 

Indartsu eta sendo agertu zen Dzanga 16a, baina Dzangaren azken zenbakia izango zen. Aldi hura amaitu zen, eta ez da egon hirugarren aldirik. Izan dira, eta orain ere bada, beste Udal aldizkaririk: Udaletik EAJren sasoian eta Talaiapekoa gaur egun (irakurtzeko, Udalaren webgunean sartu behar da eta Talaiapekoa idatzi bilatzailean). Instituzionalagoak, ordea. Herri aldizkarigintzan ere Zer Esana agur esanda zegoen ordurako. 

Indartsu diogu: Kultur etxea, Rufo, nesken futbol taldea...

Baina Rufo Atxurra dugu zenbaki honetako izarra. Berak lan egiten zuen enpresak (CAV, Compañia de Automoviles Vascongados) hartzen zuen eremuan jasotako etxe tarteko enparantzari haren izena jarri zitzaion: Rufo Atxurra enparantza. Lekeitioko memoria bizia zen, eta gerra aurreko eta osteko zerbait jakin nahi izanez gero, harengana joten genuen, Natxik eta Fernando Garateak argi azaldu dutenez zenbaki honetan bertan. Ikusita ditugu haren liburukiak ondo jasota apalean eta baten-baten barrukoak ikuskatuta ere bai. Kontua da haren ezagutzak eta jasotako informazioak legenda bihurtzeko bidean direla; izan ere, badaude inon ikusgai eta aztergai, lekeitiar guztion eskura?

 Gonbitea ikusi eta jaisteko, egin klik hemen: Rufo Atxurra enparantzaren inagurazioa, gonbitea

Arazoa da lekeitiar gehienok ez dakigula gerra aurrean eta gerra ostean zer gertatzen zen Lekeition eta zer egiten zuten lekeitiar gazteek eta ez hain gazteek (eta 700. urteurrenaren ospakizunetan ere ez zaigu gauza handirik konta). Periodikuetan beti agertzen dira pertsona handiak, handiak eta handi usteak. Letra xehekook ez dugu lekurik izaten halakoetan eta gure memoriak galdu egiten dira. Eta antzera pasatzen da Rufok bildutakoekin: ez dakigula zer bildu zuen.

Ruforen bildumatik La Gran Enciclopedia Vasca-k liburu bat atera zuen, haren ustezko iruzkinekin. Bada, pena ematen du gehien-gehiena gaztelaniaz ikusita. Eta euskaraz dagoen apurrak ez du batere ortografia-araurik zaintzen eta beste zabarkeria batzuk ere badira, Ruforen memoriari batere onik egiten ez diotenak.

Liburua ikusi eta jaisteko, egin klik hemen: Lekeitio, Rufo Atxurra

Liburuan, lau gai ageri dira 

1 Portua eta arraintza

2 Lekeitio eta automobilla

3 Herritar Erlejiotasunaren agerpena

4 "Antzar" jaiak Lekeition

 

Ikusten denez, herri xehearen kontuak eta beste inon landu eta argitaratu gabeak. Eta hala ere, interesgarriak.

Handik gutxira joan zen Rufo mundu honetatik; haren ondarea, berriz, dantzan bide dabil.

 

 

Zoritxarreko otsail hartan, baina, ez zitzaigun Dzanga bakarrik itzali. Barruan, orri solte batean Euskaldunon Egunkariaren aldarria ageri zen.

 

 

 2003ko otsailaren 20an, Auzitegi Nazionaleko instrukzio-epaile Juan del Olmok aldi baterako ixtea eta Egunkaria-ren ondasun guztiak prebentzioz enbargatzea agindu zuen, ustez ETAk kontrolatutako enpresa-multzoaren parte izatea argudiatuta. Ondotxo genekien zer ziren aldi baterako ixtea eta prebentzioz enbargatzea haiek, ze 5 urte lehenago, 1998ko uztailaren 14an, Liberte, egalite eta fraterniteran egunean, Baltasar Garzon, giza eskubideen defendatzaile sutsu hark, gauza bera egiteko agindu zuen Eginekin. Denok dakigu zer gertatu zen aldi baterako eta prebentzio haiekin: egunkari biak behin betiko itxita, ondarea galduta, eta hainbat pertsona torturatuta eta kartzelan sartuta.  

 

DZANGA 15

 

 

Aldizkaria ikusi eta jaisteko, egin klik hemen: Dzanga 15

 

Oraingoan ere bada berbalekurako gairik Dzangan. 

2002ko udan Kultur etxea San Antolin egunerako egongo zela iragarri zitzaigun. Izan zen herrian kultur etxea egoteko moduko eraikina, lekeitiar asko eta askoren izerdiarekin ordaindutakoa: Gizarte etxea. Baina, gauzak zer diren, kontuak ez zitzaizkigun atera ongi. Elizarena ei zen, eta elizak saldu egin zuen. Dirua poltsikora eta eraikina lurrera. Zerbitzu publikorako zen eremu hartan etxeak daude orain. Eta zinema, eskerrak!

Parkeko arbolak ere eztabaidagai izan ziren 20 urte lehenago lez. Berri honen ondoan, parkearen historia labur bat dator eta tartean hau esaten da:

 

 

Eskultura horien nondik norakoak Iñaki Madariagak azaldu zizkigun hitzaldi batean 2022an, Kultur etxean.

 

 

Hitzaldi haren bideoa youtuben dago jasota, Atabaka elkartearen eskutik

Iñaki Madariaga Valle, "Frantziako Fundizio Artea Lekeition"

Une honetan, eskultura horiek udal biltegi batean dagoz, zatituta. Itsusiak eta balio bakoak begitantzen zitzaizkigun (eta zaizkigu, antza), harik eta Iñakik besterik jakinarazi.

Alberto eta Bingen Barbariasen eta German Gabiolaren hegazkinaren historia ere kontatzen da.

 

Urte hartan, Isuntza arraun taldeak 25 urte bete zituen, eta liburua idatzi zuten. Resurreccionek, berriz, 109. Tentuz irakurtzeko berriak, bigarrena batez ere.

 

 

 

DZANGA 13

 

 

  

Aldizkaria ikusi eta jaisteko, egin klik hemen: Dzanga 13

 

Dzanga 13a hau ia oso-osorik gure herriak emandako gizonik ospetsuenaren gainean ―Resurreccion Maria de Azkue. 2001ean haren omenez egindako berbaldiak Euskara 2001-1ean dagoz jasota 221-254 or.― bada ere, beste gai batzuk ere aipatzen dira, azaletik aipatu ere garrantzitsuak izan arren.

Batek, kotxe asko eta toki gitxi, oraindik ere zeresana ematen segitzen du 25 urte geroago. Azken udalak aurre egin dio arazoari ―sasoia genuen― eta neurri batean herri barruko arazoa bideratzea lortu du. Herritik kanpoko aparkalekuak dira eztabaidagai: herritarrak, pozik; kanpoan bizi diren lekeitiarrak, astebururo datozenak eta udatiarrak, haserre. Beti mokoka? Negu osoa Bilbon ikasten ematen duten lekeitiar gazteek berba berri bat omen dute Bilbotik asteburuetan eta udan datozen bilbotarrak izendatzeko: bilborratak. Zelan ez gara, bada, elkarri mokoka ibiliko.

Bigarrenak, 24 urte betetzen zituen orduan, eta 48 beteko ditu aurten: Lekeitioko Euskal Zinema Bilera. Beraz, indartsu eta osasuntsu dago. 

Hirugarrenak, ostera, aspaldi galdu zuen gaurkotasuna, uda guztietan, plazan, haren izena daroan xake taldeak txapelketa bat antolatu arren. Baina bidezkoa da haren izena gogoratzea: Jokin Erdozia.

Jokin herriko gauza askotan zegoen sartuta, eta denetan zen abila: futbolean ondarrean ―Erdoziatar guztiak lez: anaia Mikel, aita Joakin eta osaba Xabier―, xakean ―Jokin Erdozia xake taldea―, musikan ―Etsaiak, Ume gaiztuak...―, Arrakala irratia, gazte mugimendua ―Ostala, mundu osoko gaztetxerik ederrena―...

 

Ezkerretik eskumatara: Jose Ramon Aretxabaleta (xake taldearen sortzaileetako beste bat), Jabi Olabarriaga, Jokin Erdozia, Jabier Barcina, Juan Luis Goitiz eta Imanol Mendiguren

Dzangan mentatzen den omenaldiaren berri Euskaldunon Egunkarian ere eman zen

 

Ez daukagu ahazteko.